Grubi në takime me përfaqësuesit e NATO-s dhe BE-së në Bruksel

Kryetari i Komisionit për Çeshtje Evropiane të Kuvendit të Republikës së Maqedonisë, z. Artan Grubi, ka nisur vizitën dyditore në Bruksel me takim në selinë qëndrore të NATOsë dhe pjesëmarrje në takimin Miqtë e Evropës.

Në NATO, Grubi është takuar me z. Knut Kirsten, përgjegjës i sekcionit politik të NATO për Maqedoninë, si dhe me përfaqësuesit politik në NATO të SHBA, Britanisë së Madhe, Hungarisë, Romanisë, Sllovenisë. 

Grubi ka theksuar domosdoshmërinë e anëtarësimit të menjëhershëm të Maqedonisë në NATO dhe gatishmërinë e autoriteteve në Shkup për ti adresuar reformat, çështjet me fqinjtë, Greqinë dhe Bullgarinë, me seriozitet dhe urgjencë. 

Krahas fqinjësisë së mirë, Grubi ka folur edhe për përkushtimin e Shkupit që ti adreson reformat për të garantuar sundim të ligjit dhe të drejtës në Maqedoni, barazinë gjuhësore dhe tema tjera me interes për bashkëbiseduesit. 

Grubi sot në Bruksel pati rastin të shkëmben opinione shkurt edhe me z. Hoyt Yee, zëvendës ndihmës sekretar i shtetit amerikan. 

Deputeti Grubi gjithashtu sot ka marrë pjesë në tryezën e rrumbullakët me temë: Ballkani Perëndimor në udhëkryq: Sfida të reja, dinamikë e ndryshuar që mbahet në Bruksel, me ftesë të Miqtë e Europës dhe të Samitit Evropian për Politikë Evropiane, ku të marrin pjesë edhe kryeministri i Shqiperisë z. Edi Rama, Drejtori i Politikës Fqinjësore Evropiane dhe Zgjërim të Komisionit Evropian, z. Kristijan Daniellson, z. Michele Giacomelli, i dërguar i posaçëm i MPJ Italiane për Ballkan, zonja Tanja Fajon dhe shumë të tjerë. 


06.Dec.2017