Ministri Nuredini së bashku me presidentin Stevo Pendarovski dhe përfaqësuesen e UNICEF-it në Maqedoninë e Veriut Patrizia DiGiovanni iu përgjigjën pyetjeve të aktivistëve të rinj që morën pjesë në Samitin Rinor për Ndryshime Klimatike në Shkup dhe të cilët sot në kuadër të Kabinetit të Hapur, vizituan vilën presidenciale. Në debatin tematik të organizuar në kuadër të aktivitetit, u diskutuan përshtypjet nga Samiti i këtij viti për Ndryshimet Klimatike COP26 në Glasgow, aktivitetet aktuale të ndërmarra nga Ministria e Mjedisit Jetësor dhe Planifikimit Hapësinor dhe hapat e ardhshëm në nivel kombëtar si dhe ingjerencat dhe kompetencat e presidentit në fushën e Ndryshimeve Klimatike. Ministri Nuredini ndau ambiciet kombëtare klimatike dhe inkurajoi të rinjtë që të marrin pjesë në mënyrë aktive në miratimin e Ligjit të parë për Veprimin Klimatik, i cili ligjërisht do t’i hapë rrugën neutralitetit të karbonit në vendin tonë. Bëhuni aktiv dhe të zëshëm që të dëgjoheni sepse ju jeni forca lëvizëse dhe motivimi në ndërtimin e shtetit rezistent ndaj klimës”, – tha Nuredini. Në këtë ngjarje, presidenti Pendarovski nënshkroi Deklaratën për fëmijë, të rinj dhe veprim klimatik.
