Nga dita e sotme filluan procedurat për thellimin e bashkëpunimit midis Komunës së Çairit dhe Komunës së Stari Gradit të Sarajevës, Bosnjës dhe Hercegovinës, me çka edhe u hap rruga e binjakëzimit të këtyre dy komunave.Stari Gradi është komuna më e vjetër në Bosnjë dhe Hercegovinë dhe historikisht më e rëndësishmja, por ajo që e bënë edhe më të rëndësishme është Bash Çarshia, tregu, më i vjetër i qytetit dhe që është i llojit të njëjtë me Çarshinë e Vjetër që është në zemër të Çairit.Me aktet e bashkëpunimit hapet rruga që mes tjerash të zhvillohen projekte të përbashkëta për ruajtjen, zhvillimin e kultivimin e këtyre dy monumenteve historike – Çarshisë së Vjetër dhe Bash Çarshisë së Sarajevës. Fillimi i procedurave të bashkëpunimit u përcoll edhe me një takim që zhvilluan në Komunën e Stari Gradit kryetari i saj Ibrahim Hadzhibajriç, kreu i Komunës së Çairit, Visar Ganiu, deputeti i BDI-së Izet Mexhiti, ambasadori i Maqedonisë së Veriut në Bosnjë dhe Hercegovinë, Ekrem Ebibi, si dhe anëtari i Kryesisë qendrore të BDI-së dhe ish-kryetar i Ligës së Boshnjakëve dhe dy mandate deputet, Rafet Muminoviq. “Njëkohësisht falënderova nikoqirët për pritjen dhe shpreha kënaqësinë e madhe për vendosjen e bashkëpunimit midis dy komunave të vendeve mike. Përkujtova se krijimi i partneriteteve mundëson transferimin e shpejtë të njohurive dhe përvojave dhe se ne duam të zhvillojmë miqësi dhe marrëdhënie të fqinjësisë së mirë me Bosnjën dhe Hercegovinën, kryeqytetin e saj dhe komunën e saj më të vjetër”, ka deklaruar me këtë rast kreu i Komunës së Çairit, Visar Ganiu.
