“Sektori i energjisë në Republikën e Maqedonisë së Veriut është një nga sektorët më të rëndësishëm për zhvillimin e ekonomisë dhe është në prioritetet e Qeverisë së Republikës së Maqedonisë së Veriut me qëllim të sigurimit të furnizimit me energji, rritje ekonomike dhe lëvizjes drejt një ekonomie të gjelbër.Një nga qëllimet kryesore të politikës energjetike të Republikës së Maqedonisë së Veriut është tërheqja e investimeve për ndërtimin e objekteve energjetike dhe rritja e shfrytëzimit të burimeve të ripërtëritshme të energjisë, përkatësisht investimi në energjinë e gjelbër që do të kontribuojë në mbrojtjen e mjedisit dhe zbutjen e ndryshimeve klimatike”, tha ministri i ekonomisë, Kreshnik Bekteshi në fjalimin e tij në Konferencën inauguruese “Për një të ardhme të gjelbër – udhëzime për kalimin në burimet e ripërtëritshme të energjisë” që u mbajt sot në organizim të Shoqatës Maqedonase për Energji nga burimet e rinovueshme (MARES)
Ministri theksoi se në këtë drejtim, Qeveria e Republikës së Maqedonisë së Veriut në fund të 2019 miratoi Strategjinë për Zhvillimin e Energjisë deri në vitin 2040 si një nga dokumentet strategjike më të rëndësishme për vendin tonë në fushën e energjetikës dhe zhvillimit të qëndrueshëm.
“Në Strategjinë në shtyllën e dekarbonizimit, ndër të tjera rekomandohet promovimi i burimeve të rinovueshme të energjisë në një mënyrë që garanton zhvillim të qëndrueshëm dhe parashikohet që centralet fotovoltaike dhe ato të erës të jenë teknologjitë me rritje më të shpejtë për prodhimin e energjisë elektrike në të gjithë skenarët. , pra është planifikuar ndërtimi i centraleve me erë prej 750 MW dhe centraleve fotovoltaike 1400 MW”, tha ministri dhe theksoi se tranzicioni energjetik është një proces i pashmangshëm dhe i dëshirueshëm që duhet nisur menjëherë.
“Në mënyrë të veçantë duhet bërë përpjekje për të krijuar një klimë të favorshme investimi për ndërtimin e termocentraleve fotovoltaike, në drejtim të thjeshtimit të procedurave administrative, duke pasur parasysh interesin e madh të investitorëve vendas dhe të huaj, të cilët shohin potencial të madh për të investuar kapitalin e tyre në shfrytëzimin e këtij burimi energjie të rinovueshme. Me një strategji korrekte për zhvillimin e energjisë, të pranuar nga të gjithë aktorët e shoqërisë dhe të zbatuar nga të gjitha qeveritë politike në periudhën e ardhshme, ne mund të bëhemi një vend i pavarur energjetik, energjia e të cilit do të bazohet në prodhimin e energjisë së pastër. Ky është një proces i vështirë, një proces që kërkon shumë kohë, shumë investime, dhe angazhim nga të gjithë aktorët, si prodhuesit ashtu edhe konsumatorët”, theksoi Bekteshi.
Ministri informoi se Qeveria në kushtet e krizës ka arritur të rrisë prodhimin vendor të energjisë elektrike, madje edhe të eksportojë energji elektrike.
“Aktualisht në vendin tonë funksionojnë centralet fotovoltaike që prodhojnë energji elektrike për 198 mijë familje. Për një periudhë gati dyvjeçare, leje pune kanë marrë 685 centrale, të cilat, sipas llogaritjeve, mund të furnizojnë me energji elektrike më shumë se 160 mijë familje me konsum mesatar në 18 qytete.Këtë vit po fillojmë edhe zbatimin e disa projekteve të mëdha investive, si ndërtimi i interkonjektorit të gazit me Greqinë, kemi zgjedhur partner për ndërtimin e hidrocentralit më të madh me pompë në Ballkan ” Çebren”, i cili është i rëndësi të madhe për dekarbonizimin dhe për tranzicionin e drejtë energjetik, është hapur në vend edhe një central privat fotovoltaik – “TEC Novaci”, i cili aktualisht është më i madhi në Ballkan.
Centrali i ri ka një kapacitet total prej 55 MW dhe parashikohet të prodhojë 85 mijë MWh në vit, që është energji elektrike që do të plotësojë nevojat e 30 mijë familjeve”, tha Bekteshi dhe shtoi se qeveria po krijon një klimë të favorshme biznesi për realizimin e investimeve në burimet e rinovueshme të energjisë.
