Në organizim të Komunës së Çairit, Dita e Evropës-9 Maji u shënua në Çarshinë e Vjetër. Ndërsa shënimit të kësaj Dite mjaft të rëndësishme iu bashkëngjit edhe ambasadori i Delegacionit të Bashkimit Evropian në Maqedoninë e Veriut, Dejvid Gir.Ngjarja u përcoll me ekspozita artistike të përgatitura nga piktorë lokalë, sikurse dhe me interpretim të muzikës klasike nga artistë të ndryshëm në “Rrugën e Evropës” në Çarshinë e Vjetër. Nga ana tjetër, nxënës të të gjitha shkollave fillore të Çairit para ambasadorit prezantuan ekspozitën me informacionet e 27 shteteve të Bashkimit Evropian me çka edhe përçuan porosinë se edhe Çairi është Evropë.“Me këtë rast përgëzuam artistët dhe fëmijët për atmosferën e mrekullueshme që krijuan sot në këtë Ditë mjaft të rëndësishme për të gjithë ne, përmes të cilës ditë përçohen dhe kultivohen vlerat më të bukura të mundshme-VLERAT EVROPIANE”, ka deklaruar kreu i Çairit, Visar Ganiu.
