Kryetari i Bashkimit Demokratik për Integrim, Ali Ahmeti përmes rrjeteve sociale ka rikujtuar dy vjetorin e ndarjes nga jeta të Madeleine Albright, që sipas Ahmetit ka qenë një nga politikanet dhe diplomatet më të shquara që ka pasur bota.
Shkrimin e tij përkujtues Ahmeti e ka shoqëruar me një fotografi të vjetër nga një takim që ka pasur me Albright dhe ka potencuar se asnjëherë nuk i harron takimet e realizuara me të, energjinë e saj pozitive, karakterin paqedashës dhe përkrahjen që i jepte gjithmonë kauzave tona kombëtare.
Shkrimi i plotë:
U bënë sot dy vite që kur u nda nga jeta një nga politikanet dhe diplomatet më të shquara që ka pasur bota, Madeleine Albright.
Nuk i harroj asnjëherë takimet e realizuara me të, energjinë e saj pozitive, karakterin paqedashës dhe përkrahjen që i jepte gjithmonë kauzave tona të drejta kombëtare, si pavarësisë e Kosovës, ashtu edhe rrugës sonë të integrimit në NATO dhe Bashkimin Europian.
Qoftë i përjetshëm kujtimi për të dhe veprën e saj madhore të promovimit të paqes botërore!
