Prof. Dr. Isamedin Azizi (Këshilltar shkencor / Profesor ordinar në Institutin e Trashëgimisë Shpirtërore e Kulturore të Shqiptarëve – Shkup)
I lindur më 13 maj 1973 në Shkup, ku kreu shkollimin fillor dhe të mesëm. Në vitin 2001 kreu studimet në universitetin “Shën Qirili dhe Metodi” – Shkup, Fakulteti Filozofik – Instituti i Historisë. Në këtë universitet, në vitin 2009 magjistroi me temën “Shqiptarët ne Ballkan 1912-1920”, ndërsa më 2013, doktoroi me temën “Raportet ndërmjet Shqipërisë dhe Mbretërisë së SKS-së/Jugosllavisë 1918-1939” dhe mori titullin doktor i shkencave historike.
Karriera e tij profesionale fillon si profesor gjimnazi (2002 – 2004, “Zef Lush Marku” – Shkup), për të vazhduar si hulumtues shkencor në “Institutin e Historisë Nacionale” – Shkup, universiteti “Shën Qirili dhe Metodi” (2004 – 2019). Nga viti 2019 e deri më sot punon në Institutin e Trashëgimisë Shpirtërore e Kulturore të Shqiptarëve” – Shkup. Sot mban thirrjen shkencore Këshilltar shkencor/Profesor ordinar të cilën e mori në vitin 2022. Në cilësinë e hulumtuesit shkencor ka qenë bartës dhe pjesëmarrës në disa projekte kërkimore-shkencore nga fusha e historisë dhe ka marrë pjesë në shumë konferenca shkencore me karakter ndërkombëtar dhe nacional. Karriera e tij akademike dhe profesionale shënon një numër të konsiderueshëm të publikimeve të artikujve shkencorë dhe botimeve të monografive në cilësinë e autorit dhe bashkautorit.
Gjatë karrierës së tij akademike, është angazhuar si ligjërues në disa universitete në vend dhe në Kosovë. Është angazhuar po ashtu edhe në cilësinë e këshilltarit shtetëror për shkencë në Ministrinë e Arsimit dhe Shkencës.
Nga viti 2021-2024 ka qenë anëtar i “Komisionit të përbashkët multidisiplinar të ekspertëve për çështje historike dhe arsimore ndërmjet Republikës së Maqedonisë së Veriut dhe Republikës së Bullgarisë”.
1 Comment