Me organizimin e ditëve të hapura në shkollat e mesme profesionale sot vazhdoi realizimi i fushatës “Mëso zgjuar, puno me profesionalizëm” edhe në Strugë të cilën për të dytin vit radhazi Ministria e Arsimit dhe Shkencës e zbaton me mbështetjen e Ambasadës së Zvicrës dhe projektit “Edukimi në Punë”, synimi i të cilit është përmirësimi i cilësisë së arsimit të mesëm profesional përmes një qasjeje gjithëpërfshirëse me pjesëmarrjen e të gjithë aktorëve sidhe promovimi i përfitimeve nga ky lloj edukimi para nxënësve të ardhshëm të shkollave të mesme. “Sot prezentojmë përparësitë dhe përfitimet e arsimit të mesëm profesional për të rinjtë nga Ohri dhe Struga. Njoftojmë gjysmëmaturantët për të gjitha risitë që do të ofrojnë shkollat e mesme profesionale nga viti akademik 2022-2023, të cilat janë arritur si rezultat i dialogut që Ministria e Arsimit dhe Shkencës po zhvillon me komunat, shkollat dhe komunitetet e biznesit. “I informojmë për planprogramet e reja, paralelet e reja duale, se cilat kompani janë të përfshira në përgatitjen praktike të studentëve, por edhe ndërgjegjësojmë se ky lloj edukimi ofron mundësi më të mëdha për suksesin e tyre personal”, tha Shaqiri. Ai përkujtoi se deri në fund të këtij muaji do të përfundojë plani për realizimin e 16 eventeve promovuese dhe kudo, siç tha ai, në çdo qytet do të dërgojmë të njëjtin mesazh – të rinjtë të fokusohen në arsimin e mesëm profesional, sepse kjo është e ardhmja. “Shoqëria po përballet me mungesë të kuadrove profesionale, ka shumë vende të lira për të cilat kërkohen kualifikime profesionale. Kështu, arsimi profesional ofron një mundësi më të madhe për hyrje të shpejtë dhe të suksesshme në tregun e punës, pavarësi më të shpejtë financiare të të rinjve dhe stabilitet ekonomik. Njëkohësisht, ofron një bazë të mirë për këdo që dëshiron të përmirësohet akademikisht”, tha Shaqiri. Ministri falënderoi të gjithë pjesëmarrësit në fushatën “Mëso zgjuar, puno me profesionalizëm”, duke theksuar se përmes një qasjeje gjithëpërfshirëse janë arritur rezultate të shkëlqyera.
