Sot në ambientet e Ministrisë për shoqëri informatike dhe administratë ministri Jeton Shaqiri priti në një takim pune ambasadorin e Republikës Popullore të Kinës, sh.t. Zhang Zuo. Gjatë takimit me ambasadorin kinez u diskutua për mundësinë e thellimit të bashkëpunimit mes dy vendeve tona në sektorin e IT. “Potenciali i Republikës Popullore të Kinës përsa i përket investimeve në fushën e IT është tejet i madh. Gjithashtu ndihma që mund të ofroj ky vend edhe në formë të konsulencës në sektorin e IT-së është shumë e mirëpritur” tha Shaqiri. Ministri Shaqiri falenderoi ambasadorin kinez për mbështetjen e ofruar deri tani përsa i përket procesit të digjitalizimit dhe për ndihmën e ofruar gjatë periudhës së pandemisë. Takimi përfundoi duke i lënë dyert hapur për të thelluar bashkëpunimet në të ardhmen.
