Ministri i Punëve të Jashtme i Republikës së Maqedonisë së Veriut, Bujar Osmani, sot realizoi takim lamtumirës me Ambasadorin e Rumanisë në Republikën e Maqedonisë së Veriut, Viorel Stanila.Në takim u shpreh kënaqësia nga zhvillimi aktual i marrëdhënieve dhe i bashkëpunimit midis dy vendeve, për të çka Ministri Osmani falënderoi Ambasadorin Stanila për angazhimin personal të tij gjatë katër viteve të fundit, si dhe për bashkëpunimin ndërmjet Ministrisë së Punëve të Jashtme të Maqedonisë së Veriut dhe Ambasadës së Rumanisë në Shkup.”Vendi ynë e vlerëson lartë mbështetjen e vazhdueshme të Rumanisë në procesin e integrimit Euro-Atlantik dhe mbështetjen në realizimin e fazës së rëndësishme në vijim – mbajtjen e Konferencës Ndërqeveritare dhe fillimin zyrtar të negociatave aderuese deri në fund të vitit,” tha Ministri.Nga të dyja palët u theksua interesi dhe përpjekjet e ndërsjella të të dy vendeve për zhvillim të mëtejshëm dhe për përforcim të marrëdhënieve dhe bashkëpunimit të përgjithshëm bilateral, veçanërisht në fushën e ekonomisë, por edhe në të gjitha fushat tjera me interes të ndërsjellë.Bashkëbiseduesit diskutuan për situatën aktuale të brendshme politike në dy vendet, me theks të veçantë në aktivitetet e Qeverive për ballafaqim me pandeminë, shkëmbyen mendime rreth situatës aktuale në rajon, rreth bashkëpunimit rajonal si dhe rreth perspektivave evropiane.
