Kryetari i BDI-së Ali Ahmeti sot me bashkëpartiakë për të katërtën ditë me rradhë ka takuar qytetarët e komunës së Gostivarit, e më saktësisht me banorët e Dutllëk, Lejthia, Banjeshnicë, Turçan i madh, Turçan i vogël, Llakavicë, Bajnicë e Epërme, Bajnicë e Poshtme, Tregu i Madh, lagja Beg, Fazaneri dhe Tullana.
Krahas kryetarit Ahmeti, para të pranishmëve fjalë rasti kishin edhe kryetari i Kuvendit Talat Xhaferi, sekretari gjeneral i BDI Faton Ahmeti, ministri i Ekonomisë Kreshnik Bekteshi, kryetari i degës së BDI në Gostivar Valdet Xhaferi si dhe deputetja Vjollca Latifi Ademi.
“BDI-ja ekziston jo vetëm për vete, por me shoqërinë dhe për shoqërinë. Shumë parti opozitare, shqiptaro-maqedone tentuan ta mposhtin BDI-në, Ali Ahmeti me qetësinë e tij i dërgoj teposhtë, nga Cërvenkovski deri tek Gruevski. Partitë e sotme për liderin nuk janë fare konkurent, sepse Ahmeti është lider tek i cili shqiptarët shohin shpresën. Njeriun të pavdekshëm e bëjnë veprat, thotë një fjalë e urtë. Puna jonë është që të bëjmë reale dhe të prekshme Maqedoninë europiane, e BDI-ja është instrument nga i cili do të arrijmë. Ne do ta ndryshojmë rrugën e fëmijëve tanë. Ne nuk do të shkojmë në Europë, por do ta sjellim atë në vendet tona. Kjo është një realitet”, tha Latifi.
