Zëvendësministri i Mbrojtjes së Republikës së Maqedonisë së Veriut, Bashkim Hasani sot qëndroi për vizitë zyrtare njëditore në Ministrinë e Mbrojtjes së Republikës së Kosovës ku u prit nga homologu i tij zëvendësministri Shemsi Syla.
Në takim u bisedua lidhur me zgjerimin e bashkëpunimit ne fushën e mbrojtjes dhe sigurisë dhe në veçanti për mundësinë e shfrytëzimit të kapaciteteve ushtarake të përbashkëta. Hasani gjithashtu theksoi gatishmërinë e Ministrisë së Mbrojtjes dhe Maqedonisë së Veriut për të ndihmuar Forcat e Sigurisë së Kosovës dhe Republikën e Kosovës në rrugën drejt integrimit të plotë në NATO përmes ndarjes së përvojave të vendit në këtë rrugëtim.
Në kuadër të vizitës në ministri, Hasani vizitoi Qendrën për Studime Universitare dhe Shtabin e Përgjithshëm të Forcave të Sigurisë së Kosovës.
Zëvendësministri Syla u falënderua për vizitën dhe bashkëpunimin në mbrojtje dhe me këtë rast shtroi prioritetet e Forcave të Sigurisë së Kosovës. Ai gjithashtu potencoi rëndësinë e Qendrës së Kosovës për Mbrojtje dhe Shpëtim në kuader te FSK dhe mundësinë e shfrytezimit të së njëjtës.
