Ministri i Punëve të Jashtme, Bujar Osmani, nesër, më 15 mars 2023, do të qëndrojë për vizitë zyrtare në Mbretërinë e Suedisë, kryesuese aktuale e Këshillit të BE-së. Në delegacionin e Ministrit Osmani është edhe kryetari i Komisionit Parlamentar për Çështje Europiane, Arbër Ademi.
Ministri Osmani do të ketë takim me homologun e tij suedez, Ministrin e Punëve të Jashtme Tobias Bilstrom, si dhe me kryetarin e Parlamentit suedez, Andreas Norlen dhe drejtoren e përgjithshme të Agjencisë Suedeze për Zhvillim (SIDA), Karin Jemtin.
Në fokus të bisedimeve me bashkëbiseduesit do të jetë procesi ynë i anëtarësimit në BE dhe prioritetet e Suedisë për Ballkanin Perëndimor në kuadër të kryesimit aktual të Bashkimit Europian, kryesimit tonë të OSBE-së me theks në çështjet politike dhe të sigurisë në dritën e invazionit rus ndaj Ukrainës, stabilitetit dhe sigurisë së rajonit të Ballkanit Perëndimor, si dhe marrëdhënieve bilaterale dhe ndihmës zhvillimore suedeze për shtetin tonë.
