Zëvendëskryeministri i parë i Qeverisë së Maqedonisë së Veriut, Artan Grubi së bashku me kryeministrin Dimitar Kovaçevski dhe kolegë tjerë të kabinetit qeveritar kanë takuar delegacionin e Qeverisë së Republikës së Shqipërisë, të udhëhequr nga kryeministri Edi Rama.
Në takimin dypalësh, siç njofton zëvendëskryeministri i parë Grubi, bashkërisht është konstatuar se vendet e Ballkanit Perëndimor, përfshirë Shqipërinë dhe Maqedoninë e Veriut, kanë përpara një punë serioze, sepse ka ardhur koha kur do të duhet të arrihen arritje thelbësore në drejtim të përmirësimit të kapaciteteve, efikasitetin dhe konkurrencën e ekonomive të rajonit në tërësi, gjë që do të çojë në rritjen dhe zhvillimin e përshpejtuar ekonomik rajonal.
“Kënaqësi që bashkë me Kryeministrin Dimitar Kovaçevski mirëpritëm në takim pune Kryeministrin e Republikës së Shqipërisë, Edi Rama. Bashkëpunimi dhe koordinimi institucional i Maqedonisë së Veriut dhe Shqipërisë janë jetike për projektimin e suksesshëm të së ardhmes së përbashkët progresive dhe europiane”, ka deklaruar pas takimit zëvendëskryeministri Grubi.
