Në kuadër të pjesëmarrjes në Samitin e NATO-s në Vilnius, Ministri i Punëve të Jashtme, Bujar Osmani, sot realizoi takim me homologun e tij nga Greqia, Jorgos Gerapetritis.
Në fokus të takimit të parë ndërmjet dy ministrave ishin marrëdhëniet bilaterale dhe perspektiva e forcimit të bashkëpunimit sektorial të dy shteteve dhe partnerëve fqinjë. Në këtë kontekst, u veçua bashkëpunimi në lidhje me energjinë dhe gazin.
Për të ardhmen evropiane të Maqedonisë së Veriut dhe vendeve të tjera nga Ballkani Perëndimor u theksua mbështetja dhe qëndrimet e qarta të Athinës zyrtare në këtë drejtim. “Greqia vazhdon të jetë partnere e fuqishme e vendit tonë dhe e rajonit në përpjekjet për përfundimin sa më të shpejtë dhe të suksesshëm të procesit të anëtarësimit në Bashkimin Europian, për çka i kam përcjellë mirënjohjen tonë”, tha Osmani në takim.
Duke theksuar rëndësinë e Marrëveshjes së Prespës për dinamikën e përgjithshme të marrëdhënieve, nevojën për angazhim shtesë të përbashkët për përmbushjen e asaj që është dakorduar nga Plani i Veprimit për intensifikimin dhe pasurimin e bashkëpunimit, si dhe për përpjekjet e bëra për ratifikimin e dokumenteve të mbetura të nënshkruara ndërmjet dy shteteve.
