Kryetari i Komisionit për Çështje Evropiane të Kuvendit të Republikës së Maqedonisë së Veriut, Arbër Ademi, mori pjesë në Panel diskutimi kushtuar Përfitimeve të Procesit të Berlinit për Maqedoninë e Veriut, organizuar nga Instituti për Demokraci.
Ademi mbajti fjalimin hyrës në panelin e parë kushtuar Përfitimeve të Procesit të Berlinit për Maqedoninë e Veriut me “Vështrim mbi atë që është punuar në pjesën e tregut të përbashkët rajonal me fokus në roaming”, në të cilin theksoi se si kryetar i Komisionit Parlamentar për Çështje Evropiane, angazhohet për përfitimet politike nga ky proces, në drejtim të zhvillimit të bashkëpunimit rajonal dhe perspektivës së BE-së për rajonin. Në këtë drejtim, informoi se në samitin e tetorit në Tiranë, u kërkua themelimi i dimensionit parlamentar të procesit të Berlinit.
Duke iu referuar Tregut të Përbashkët Rajonal, theksoi se ai do ta çojë rajonin drejt tregut të përbashkët të BE-së dhe do t’i vendosë vendet e Ballkanit Perëndimor në hartën e investitorëve globalë dhe me këtë, tha Ademi, do të hapen vende të reja pune, përzgjedhje më e madhe e produkteve me çmime më të ulëta dhe mundësi për njerëzit që punojnë në të gjithë rajonin.
Si përfitime të procesit të Berlinit, Ademi theksoi tre marrëveshjet e nënshkruara të ashtuquajtura marrëveshjet e mobilitetit: Marrëveshja për njohjen e kualifikimeve akademike, Marrëveshja për njohjen e kualifikimeve profesionale dhe Marrëveshja për udhëtimin e lirë të qytetarëve nga Ballkani Perëndimor me letërnjoftim.
Në Konferencë fjalim kishte edhe ambasadorja e Gjermanisë në Maqedoninë e Veriut, znj. Petra Dreksler.
