Është nënshkruar sot Marrëveshja për bashkëfinancim të rrugës Tetovë-Prizren ndërmjet Qeverisë së Maqedonisë së Veriut dhe Kosovës.
Zëvendëskryeministri i parë, Artan Grubi përmes një postimi në faqen e tij zyrtare në Facebook shkruan se ky investim është i një rëndësie të veçantë për të dy vendet, projekt i cili do të zhvilloi edhe më shumë turizmin dhe ekonominë.
Statusi i plotë:
Hapim shtigje të reja për ndërlidhje më cilësore me Republikën e Kosovës!
Sot u nënshkrua Marrëveshja për bashkëfinancim të rrugës Tetovë – Prizren mes Qeverisë së Republikës së Maqedonisë së Veriut dhe Qeverisë së Republikës së Kosovës, me çka ky projekt jashtëzakonisht i rëndësishëm për përforcimin e bashkëpunimit tonë ndërshtetëror po hyn në fazën e tij zyrtare të realizimit.
Kjo rrugë do të kalojë përmes Qendrës Turistike “Kodra e Diellit” dhe me Republikën e Kosovës lidhja do të mundësohet përmes një tuneli prej 6.4 kilometra duke krijuar kështu perspektivë të re progresive për zhvillim të ekonomisë dhe turizmit.
Përgëzoj ekipet e punës nga të dyja shtetet për angazhimin e deritanishëm dhe uroj punë të mbarë për finalizimin dinamik të këtij projekti kapital!
