Zajaz, 10 qershor 2026
Kryetari i Bashkimit Demokratik për Integrim, Ali Ahmeti, bashkëbisedoi me të rinjtë në Kompleksin Memorial “Nëna Shqiptare” në Zajaz, me rastin e 10 Qershorit – Ditës së Lidhjes Shqiptare të Prizrenit.
Në një vend që simbolizon sakrificën, qëndresën dhe kujtesën kombëtare, u diskutua për rrugëtimin historik të shqiptarëve, sfidat e kohës sonë dhe përgjegjësinë që ka çdo brez për ruajtjen dhe avancimin e vlerave për të cilat janë sakrifikuar gjenerata të tëra.
Kryetari Ahmeti vlerësoi veçanërisht pjesëmarrjen e madhe të të rinjve, energjinë e tyre pozitive dhe gatishmërinë për të kontribuar në proceset që lidhen me të ardhmen e popullit dhe shtetit.
Ai theksoi se historia nuk ndërtohet vetëm nga ata që e shkruajnë, por edhe nga ata që e kuptojnë, e mbrojnë dhe e vazhdojnë atë, duke nënvizuar se rinia mbetet forca më e madhe dhe garancia më e sigurt për të ardhmen tonë.
Në frymën e Lidhjes Shqiptare të Prizrenit, u riafirmua përkushtimi për ruajtjen e identitetit kombëtar, forcimin e unitetit dhe ndërtimin e një të ardhmeje më të mirë për brezat që vijnë.
