Ministri i Ekonomisë Kreshnik Bekteshi sot ka zhvilluar takim me Jaroslav Ludva, ambasadorin e sapoemëruar të Republikës Çeke në Maqedoninë e Veriut. Ministri Bekteshi i uroi mandat të suksesshëm ambasadorit Ludva me shpresë për vazhdimin e bashkëpunimit të shkëlqyer mes dy vendeve. Në takim u konstatua se ka një zhvillim pozitiv të marrëdhënieve dypalëshe mes dy vendeve, për të cilat janë identifikuar mundësitë për аvancim të mëtejshëm. Në këtë drejtim, ministri Bekteshi theksoi rëndësinë e vazhdimit dhe intensifikimit të bashkëpunimit të ndërsjellë në të gjitha fushat, veçanërisht në forcimin e tregtisë dypalëshe dhe rritjen e investimeve çeke në vend. Ministri Bekteshi theksoi se Republika Çeke është një partner i rëndësishëm tregtar i vendit tonë, në vitin 2018 dhe 2019 është në vendin e 19-të me të cilin Republika e Maqedonisë së Veriut arrin vëllimin më të madh të tregtisë, në vendin e 18-të në vitin 2020 dhe në vendin e 16-të në vitin 2021. Në vitin 2021, tregtia e përgjithshme dypalëshe u rrit me 26,7%, eksportet u rritën me 78,7% dhe importet me 1,1% krahasuar me vitin 2020. Ministri Bekteshi theksoi se Republika e Maqedonisë së Veriut dhe Republika Çeke kanë një zhvillim pozitiv në marrëdhëniet e ndërsjellta ekonomike, që mund të konstatohet, ndër të tjera, edhe përmes rritjes së tregtisë në vitet e fundit. Të dyja palët tregojnë interes të madh për avancimin e mëtejmë të marrëdhënieve ekonomike dhe tregtare, në kuadër të seancave të Komitetit të Përbashkët në përputhje me Marrëveshjen bilaterale për bashkëpunim ekonomik dhe industrial ndërmjet Qeverisë së Republikës së Maqedonisë së Veriut dhe Qeverisë së Republikës Çeke. Ministri Bekteshi dhe ambasadori Ludva u dakorduan për vazhdimin e komunikimit për përmirësimin e marrëdhënieve ekonomike dhe gjetjen e zgjidhjeve më të përshtatshme për zhvillimin ekonomik të dy vendeve.
