Në margjinat e Konferencës Ndërkombëtare të Kombeve të Bashkuara për një planet të shëndetshëm, Stokholm +50, Nuredini zhvilloi disa takime, duke përfshirë edhe ministrin Norvegjez për Klimën dhe Mjedisin Jetësor Espen Barth Eide. Ministri Nuredini falënderoi Norvegjinë për mbështetjen në zbatimin e njërit prej projekteve më të mëdha për trajtimin e mbeturinave historike në Maqedoninë e Veriut, pastrimin e mbeturinave të rrezikshme nga ish-gjigandi industrial Ohis, si dhe diskutuan edhe për realizimin e projekteve të tjera të përbashkëta për mbrojtjen e mjedisit jetësor. Ministri Nuredini u takua edhe me komisionerin e BE-së për mjedis jetësor, oqeane dhe peshkim Virginius Sinkevicius dhe zëvendëskryeministrin bullgar Boris Sandov, me ç’rast biseduan për gjendjen e mjedisit jetësor në Maqedoninë e Veriut, për aktivitetet e ndërmarra në arritjen e standardeve evropiane dhe qëllimeve kombëtare. Qëndrimi ishte i përbashkët si për ambiciet e mëtejshme.Gjithashtu, ministri Nuredini u takua edhe me Sekretaren e Shtetit të Zvicrës Catherine Schneberger, ku biseduan për mbështetjen e dhënë nga Qeveria zviceriane për Maqedoninë e Veriut, veçanërisht në fushën e mbrojtjes së natyrës përmes Programit për Mbrojtjen e Natyrës dhe përfshirjen e tyre në proceset e shpalljes së Osogovës dhe Maleshevës për zonë të mbrojtur, por edhe për mbështetjen e vazhdueshme për menaxhimin e mbeturinave, veçanërisht në Pollog.
