Ministri i Mjedisit Jetësor dhe Planifikimit Hapësinor Naser Nuredini, mori pjesë në mbledhjen e sotme të Këshillit për Zhvillim të Rajonit Planor të Pollogut. Në takim, ministri Nuredini informoi se Ligji për Huamarrjen lidhur me kredinë nga Banka Evropiane për Rindërtim dhe Zhvillim, destinuar për vendosjen e sistemit rajonal për menaxhimin e mbeturinave në vend, aktualisht është në Kuvendin e RMV-së në pritje të votimit nga deputetët.
Ministri Nuredini po ashtu theksoi se në kuadër të projektit për vendosjen e sistemit rajonal për menaxhimin e mbeturinave, përveç ndërtimit të stacioneve të transferimit dhe deponive rajonale, komunat do të furnizohen me pajisje shtesë teknike, si makineri për grumbullimin e mbeturinave dhe kontejnerë seleksionues.
Sipas ministrit, me aktivitetet e planifikuara deponitë rajonale do t’i përmbushin të gjitha standardet evropiane dhe do të mundësojnë rehabilitimin e të gjitha deponive ilegale në rajonin e Pollogut, që do t’u mundësojë qytetarëve të kenë ajër të pastër, mbrojtje të natyrës dhe biodiversitet dhe ujë të pastër për pije.
Në takimin e sotëm u diskutua edhe për iniciativën e Qendrës për Zhvillim të Rajonit Planor të Pollogut për fillimin e aktiviteteve për themelimin e një organi ndërkomunal për dhënien e lejeve dhe inspektimin në fushën e mjedisit jetësor.
