Ministri i Punëve të Jashtme, Bujar Osmani, në Shkup mbajti takim me deputetin dhe kryesuesin e Komision të Bashkimit Evropian në Bundestagun gjerman, Anton Hofreiter.
Të dy bashkëbiseduesit konstatuan se Gjermania është partneri kryesor politik i Maqedonisë së Veriut, i cili edhe më tej do të na mbështesë në përpjekjet për reforma, të cilat i ndërmarrin Institucionet në vendin tonë me qëllim të progresit të shpejtë gjatë negociatave për anëtarësim në Bashkimin Evropian.
Hofreiter e përsëriti përkushtimin se Gjermania do të vazhdojë edhe në të ardhmen me të gjithë kapacitetin e saj politik dhe institucional ta mbështesë Maqedoninë e Veriut në rrugën e anëtarësimit të plotë në BE.
Çështjet politike, ato të sigurisë, dhe sfidat ekonomike me të cilat përballet kontinenti evropian për shkak të invazionit rus ndaj Ukrainës, gjithashtu ishin temë e bisedës ndërmjet dy bashkëbiseduesve, të cilët theksuan rëndësinë e përgjigje të përbashkët për ruajtjen e sigurisë dhe qëndrueshmërinë evropiane dhe globale.
