Ministri i Punëve të Jashtme, Bujar Osmani, në margjinat e Seancës së 77-të të Asamblesë së Përgjithshme të KB-së, realizoi takim me Ministrin e Punëve të Jashtme të Mbretërisë së Bahreinit, Abulatif bin Rashid Allzajani.
Në takim u shkëmbyen mendime për marrëdhëniet bilaterale, ku Ministri Osmani i theksoi angazhimet për dinamizimin e bashkëpunimit në fushën e ekonomisë, turizmit, tregtisë dhe investimeve. Me këtë rast, u potencua se të dy vendet kanë potencial të madh për thellimin e lidhjeve të biznesit, të cilave, në periudhën në vijim do t’i kushtohet vëmendje veçantë.
Bashkëbiseduesit shprehën pritjen për pasurimin e kornizës së marrëveshjes, si dhe forcimin e bashkëpunimit në të ardhmen në fushën e diplomacisë multilaterale.
Gjithashtu, u shkëmbyen mendime për prioritetet e politikës së jashtme të të dy vendeve, si dhe për çështjet aktuale ndërkombëtare dhe temat rajonale.
