Kryetari i Bashkimit Demokratik për Integrim, z. Ali Ahmeti sot ka pritur në takim ambasadoren e Shteteve të Bashkuara të Amerikës, znj. Angela Aggeler, të cilës i dëshiroi shumë suksese në detyrën e re.
Bashkëpunimi mes dy vendeve, integrimi europian, ndryshimet kushtetuese dhe reformat, situata politike në vend dhe rajon, si dhe procesi i vetingut ishin vetëm disa tema në të cilat kanë diskutuar Ahmeti dhe Aggeler.
Ahmeti është shprehur se rikthimi I ambasadores Aggeler dhe njohuritë e saj mbi vendin dhe rrethanat do të kontribuojnë në avancimin e marrëdhënieve bilaterale dhe forcimin edhe më të madh të bashkëpunimit mes dy vendeve.
Z. Ahmeti ka shprehur falenderim për ndihmën amerikane për reformat dhe procesin e integrimit europian.
Integrimi i plotë i vendit tonë dhe i Ballkanit Perëndimor në Bashkimin Europian është garancë shtesë për stabilitetin dhe prosperitetin e rajonit.
Gjatë takimit, Ahmeti dhe Aggeler kanë biseduar për nevojën e ndryshimeve kushtetuese si kusht për vazhdimin e rrugës europiane, andaj është vlerësuar se të gjithë forcat politike në vend duhet të reflektojnë dhe të mos mbajnë peng të ardhmen e vendit dhe qytetarëve.
Ndërkohë që z. Ahmeti e ritheksoi procesin e vetingut si të nevojshëm për faktin se do jetë forma më e mirë për pastërtinë e figurave në të gjitha sferat që nga politika e deri tek prokurorët dhe gjykatësit, si formë kontrolli para se të njëjtët të zgjidhen në detyra të caktuara.
Z. Ahmeti u shpreh mirënjohës për rolin jetik të SHBA-ve në vend dhe rajon,si dhe theksoi se ai dhe BDI janë partner dhe në dispozicion të plotë për agjendën progresive proeuropiane, sundimin e ligjit, reformave dhe luftës kundër krimit të organizuar dhe korrupsionit.
