Informacione alarmante nga sinjalizues brenda Qeverisë tregojnë një skandal të rëndë: vendime dhe informacione të ndjeshme kalojnë në seancat e Qeverisë pa dijeninë e përfaqësuesve të s’Vlen-it.
Sipas informacioneve që kemi marrë, në një pjesë të madhe të seancave të mbyllura, ku shqyrtohen çështje të ndjeshme dhe materiale me karakter të klasifikuar, nuk merr pjesë asnjë përfaqësues i s’Vlen-it.
Ata nuk i lexojnë materialet. Nuk janë aty kur diskutohen. Nuk e dinë çfarë vendoset. Presin që më pas ministrat e VMRO-DPMNE-së t’ua tregojnë atë që kanë vendosur.
Kjo ngre një pyetje serioze: çfarë vendimesh janë marrë deri më sot në seanca të mbyllura pa dijeninë dhe pa praninë e asnjë përfaqësuesi shqiptar në Qeveri?
Në një shtet ku shqiptarët përbëjnë një pjesë qenësore të popullsisë dhe të institucioneve, është e papranueshme që vendimet më të ndjeshme shtetërore të kalojnë pa përfaqësimin e tyre.
Ky është nivel i paprecedentë të përjashtimit të shqiptarëve nga vendimmarrja reale shtetërore.
