Gjatë ditës së sotme ministri Nuredini vizitoi Universitetin e Tetovës dhe zhvilloi një takim me Rektorin i e Universitetit, Prof. Dr. Vullnet Ahmeti. Në takim u bisedua për bashkëpunimin që zhvillohet mes dy institucioneve, kontributin e përbashkët në projektet shkencore të mjedisit jetësor si dhe u shqyrtuan mundësitë për thellimin e bashkëpunimit. Ministria e Mjedisit Jetësor dhe Planifikimit Hapësinor, në kuadër të programës së investimeve në mjedisin jetësor për vitin 2021, ka përzgjedhur projektin ”Hulumtimi i kualitetit të ajrit në Tetovë dhe rrethinë”, i cili do të realizohet nga Universiteti i Tetovës, respektivisht nga Fakulteti i Shkencave Matematike-Natyrore. Rektori i UT-së, Prof. Dr. Vullnet Ameti, e falënderoi ministrin Nuredini për mbështetjen e ofruar për Universitetin e Tetovës, sidomos në përzgjedhjen e projekteve hulumtuese që realizohen nga Fakulteti iShkencave Matematike – Natyrore. Ministri Nuredini potencoi rëndësinë që kanë këto projekte për mbrojtjen e mjedisit jetësor dhe si të tilla duhet të mbështeten nga institucionet përkatëse. “Është në detyrën e dikasterit që unë drejtoj të mbështesim hulumtuesit shkencorë dhe zhvillimin e këtyre projekteve e që janë në dobi të të gjithë qytetarëve tanë.” – tha ministri Nuredini. Në takim, palët shprehën gatishmërinë të thellojnë më tutje bashkëpunimin ndërinstitucional për të kontribuar edhe më shumë në mbrojtjen e mjedisit jetësor.
