Ministri i Punëve të Jashtme Bujar Osmani, në kuadër të Samitit të sotëm të krerëve të shteteve dhe qeverive të Frankofonisë, i cili po mbahet në ishullin Xherba të Tunizisë, ka zhvilluar një sërë takimesh bilaterale me liderë botërorë, përfshirë këtu Kryeministrin kanadez, Xhastin Trudo si dhe me Presidentin e Këshillit Evropian, Çarlls Mishel.
Në kuadër të takimeve, përveç temave të Samitit të Frankofonisë, Osmani i shfrytëzoi edhe për të shkëmbyer mendime për tema aktuale që kanë të bëjnë me integrimin evropian të vendit, sfidat gjeopolitike brenda aleancës së NATO-s, si dhe prioritetet e kryesimit të ardhshëm të OSBE-së në vitin 2023.
Udhëheqësit botërorë të vendeve anëtare të Frankofonisë u mblodhën për dy ditë në Xherba të Tunizisë, në Samitin e Frankofonisë, i cili po mbahet për herë të parë në një vend arab të Afrikës së Veriut, ku morën pjesë krerët e shteteve dhe qeverive të 88 vendeve nga 5 kontinente.
