Kryetari i Kuvendit të Republikës së Maqedonisë së Veriut, Talat Xhaferi, sot, pranoi delegacion të Këshillit të Ambasadorëve Amerikanë (CAA), të kryesuar nga Timoti Çorba, kryetar i CAA.
CAA është bashkim i ambasadorëve të jo-karrierës të Shteteve të Bashkuara të Amerikës, që, mes tjerash, mbështet rolin e vendit të tyre dhe ambasadorëve amerikanë në zbatimin e politikës së jashtme të SHBA-së në ambasadat në mbarë botën.
Në kuadër të misionit të tyre në gjetjen e fakteve, të ftuarit janë për vizitë në Republikën e Maqedonisë së Veriut, Republikën e Shqipërisë dhe Republikën e Kosovës.
Në takim, kryetari Xhaferi theksoi se partneriteti strategjik ndërmjet dy vendeve bazohet në vlera dhe interesa të përbashkëta, ndërsa Republika e Maqedonisë së Veriut është e përkushtuar për bashkëpunim të ngushtë me SHBA-në për një sërë çështjesh, duke përfshirë sigurinë, zhvillimin ekonomik dhe sundimin demokratik.
Kryetari Xhaferi, i njoftoi mysafirët për progresin e deritanishëm të Republikës së Maqedonisë së Veriut në procesin e integrimeve evropiane, por edhe për sfidat me të cilat po përballemi, si dhe për obligimet që i realizon Kuvendi në lidhje me këtë çështje.
Kryetari Xhaferi e dënoi agresionin rus ndaj Ukrainës, duke nënvizuar se vendi ynë është i përfshirë në të gjitha veprimet e bashkësisë ndërkombëtare në mbështetje të Ukrainës.
Nga ana e tyre, të ftuarit e lartë nënvizuan se anëtarësimi i Maqedonisë së Veriut në BE sjell përfitime të mëdha për vendin dhe u bënë thirrje faktorëve politikë që t’i tejkalojnë sfidat gjatë rrugës. Ata, gjithashtu, shprehën interesim edhe për situatën e përgjithshme politike në vend.
