Kryetari i Bashkimit Demokratik për Integrim, Ali Ahmeti përmes një postimi në profilin e tij në FB ka shprehur ngushëllime për ndarjen nga jeta e ish presidentit të Finlandës, z. Martti Ahtisaari, duke theksuar se me karakterin e tij paqedashës, Ahtisaari la gjurmë të pashlyeshme kontributi në shumë misione të ndryshme ndërkombëtare, ndërsa kombi ynë mbetet përjetë mirënjohës ndaj angazhimit të tij të sinqertë për zgjidhjen e statusit të Kosovës, vendosjen e drejtësisë në vend dhe për konkretizimin e pavarësisë së saj.
Postimi i plotë:
Me keqardhje pranova sot lajmin për ndarjen nga jeta të diplomatit të Kombeve të Bashkuara, nobelistit të paqes dhe ish presidentit të Finlandës, z. Martti Ahtisaari.
Me karakterin e tij paqedashës, z. Ahtisaari la gjurmë të pashlyeshme kontributi në shumë misione të ndryshme ndërkombëtare, ndërsa kombi ynë mbetet përjetë mirënjohës ndaj angazhimit të tij të sinqertë për zgjidhjen e statusit të Kosovës, vendosjen e drejtësisë në vend dhe për konkretizimin e pavarësisë së saj.
Këmbëngulja e tij mbi ngadhënjimin e vlerave të paqes, zëri i tij i ngritur fuqishëm dhe guximshëm kundër padrejtësisë, le të jetë frymëzim i përjetshëm dhe parim i ndërtimit të jetës sonë shoqërore.
Qoftë i përjetshëm kujtimi për madhështinë e personalitetit të tij! Ngushëllime të sinqerta familjes Ahtisaari, të gjithë bashkëveprimtarëve të tij kudo në botë dhe atyre që e njohën!
U prehtë në paqe!
