Shkup, 13 gusht 2025
Me Akademinë Solemne të organizuar sonte, u shënua 24-vjetori i Marrëveshjes së Ohrit, dokumentit historik që garantoi paqen, stabilitetin dhe perspektivën euroatlantike të Republikës së Maqedonisë së Veriut.
Në fjalën e tij, kryetari i Bashkimit Demokratik për Integrim, Ali Ahmeti, theksoi se Marrëveshja e Ohrit mbetet themeli i bashkëjetesës, barazisë dhe funksionimit demokratik të shtetit, duke rikujtuar se shqiptarët dhe maqedonasit kanë ndarë përgjegjësinë për ndërtimin e një shteti të përbashkët, stabil dhe evropian.
Ai nënvizoi se sot, më shumë se kurrë, nevojitet respektim i plotë dhe i sinqertë i Marrëveshjes së Ohrit, forcim i institucioneve dhe rikthim i besimit të qytetarëve përmes standardeve më të larta të përgjegjësisë dhe integritetit, duke vlerësuar se procesi i vetingut paraqet një domosdoshmëri në këtë drejtim.
Kryetari Ahmeti ritheksoi se pa barazinë dhe partneritetin e plotë ndërmjet komuniteteve nuk mund të ketë shtet të qëndrueshëm dhe as të ardhme evropiane, ndërsa besëlidhja e përbashkët duhet të mbetet e ndërtuar mbi paqen, dinjitetin, barazinë, dialogun dhe drejtësinë.
