Tetovë, 13 korrik 2025
Kryetari i Bashkimit Demokratik për Integrim, Ali Ahmeti, zhvilloi një takim me Presidentin e Republikës së Shqipërisë, Sh.T. Bajram Begaj, në Ohër.
Gjatë takimit, bashkëbiseduesit diskutuan për forcimin e marrëdhënieve ndërmjet Republikës së Maqedonisë së Veriut dhe Republikës së Shqipërisë, si dhe për rëndësinë e thellimit të bashkëpunimit rajonal në funksion të stabilitetit, zhvillimit dhe integrimit të plotë të rajonit në Bashkimin Evropian.
Kryetari Ahmeti theksoi se bashkëpunimi ndërmjet dy vendeve është kyç për ndërtimin e urave të mirëkuptimit, forcimin e partneriteteve strategjike dhe avancimin e perspektivës evropiane të rajonit.
Ai nënvizoi se angazhimi për integrimin evropian nuk është vetëm një objektiv politik, por një vizion i përbashkët për paqe të qëndrueshme, zhvillim ekonomik dhe një të ardhme më të mirë për qytetarët e vendeve tona.
Takimi u zhvillua në frymën e marrëdhënieve të shkëlqyera ndërmjet dy vendeve dhe të përkushtimit të përbashkët për forcimin e bashkëpunimit rajonal dhe evropian.
