Tetovë, 10 qershor 2026
Kryetari i Bashkimit Demokratik për Integrim, Ali Ahmeti, zhvilloi një takim miqësor me Sh.T.Z. Christoph Sommer, Ambasador i Konfederatës Zvicerane në Republikën e Maqedonisë së Veriut.
Gjatë takimit, bashkëbiseduesit vlerësuan marrëdhëniet tradicionalisht të shkëlqyera ndërmjet Zvicrës dhe Republikës së Maqedonisë së Veriut, si dhe kontributin e vazhdueshëm zviceran përmes programeve të bashkëpunimit në fusha me rëndësi strategjike, si qeverisja demokratike dhe e mirë, zhvillimi ekonomik i qëndrueshëm, si dhe mbrojtja e ujit dhe mjedisit.
Në këtë kontekst, kryetari Ahmeti theksoi rëndësinë e ruajtjes dhe avancimit të arritjeve strategjike të vendit, duke nënvizuar se Marrëveshja Kornizë e Ohrit, Marrëveshja e Prespës dhe Marrëveshja për Fqinjësi të Mirë mbeten shtylla themelore të paqes, stabilitetit, bashkëjetesës ndëretnike dhe përparimit në rrugën e integrimit evropian.
Kryetari Ahmeti shprehu mirënjohje për mbështetjen e vazhdueshme të Konfederatës Zvicerane ndaj proceseve demokratike dhe zhvillimore në vend, duke riafirmuar gatishmërinë për thellimin e mëtejshëm të bashkëpunimit në të ardhmen.
