Tetovë, 20 dhjetor 2024
Kryetari i Bashkimit Demokratik për Integrim, Ali Ahmeti, zhvilloi një takim në Tetovë me Ambasadorin e Republikës së Çekisë në Shkup, Jaroslav Ludva.
Gjatë takimit, bashkëbiseduesit diskutuan për procesin e integrimit evropian të Republikës së Maqedonisë së Veriut dhe prioritetet strategjike për të ardhmen e vendit.
Kryetari Ahmeti theksoi se vazhdimi i rrugës evropiane mbetet prioritet absolut për të, për Bashkimin Demokratik për Integrim dhe për shqiptarët, duke nënvizuar se ky duhet të jetë një objektiv i përbashkët i të gjithë qytetarëve dhe institucioneve të vendit.
Ai rikujtoi se Republika e Maqedonisë së Veriut është një shtet multietnik dhe se harmonia, bashkëjetesa dhe respekti i ndërsjellë ndërmjet shqiptarëve dhe maqedonasve përbëjnë gurthemelin e stabilitetit, sigurisë dhe zhvillimit afatgjatë.
Kryetari Ahmeti shprehu shqetësimin për cenimin e Marrëveshjes së Ohrit dhe për sfidat që lidhen me Ligjin për Përdorimin e Gjuhëve, duke theksuar se respektimi i këtyre arritjeve është thelbësor për ruajtjen e barazisë, stabilitetit dhe perspektivës evropiane të vendit.
Për drejtësi, barazi dhe integrim evropian!
