Kryetari i Bashkimit Demokratik për Integrim, Ali Ahmeti, uroi nga zemra kryetarin e ri të Aleanca për Ardhmërinë e Kosovës, Ardian Gjini, për marrjen e detyrës së re. Ahmeti vlerësoi se Aleanca për Ardhmërinë e Kosovës ka luajtur një rol të rëndësishëm në konsolidimin e pluralizmit politik në Republikën e Kosovës, si një forcë shtetformuese që ka kontribuar vazhdimisht në proceset e shtetndërtimit.
Ai theksoi se AAK-ja, si parti që në themel të saj ka çështjen kombëtare, ndërtimin e shtetit dhe orientimin euro-atlantik drejt NATO-s dhe Bashkimit Evropian, ka ruajtur për dekada këtë qëndrim të qartë dhe të palëkundur nën udhëheqjen e themeluesit të saj, Ramush Haradinaj. Sipas Ahmetit, Ardian Gjini, me përvojën dhe përkushtimin e tij, do të vazhdojë këtë rrugë me përgjegjësi dhe vizion, në të mirë të AAK-së dhe të Republikës së Kosovës.
Urime dhe suksese në këtë përgjegjësi të re!
