Ministri i Punëve të Jashtme, Bujar Osmani, sot e pranoi Ambasadorin e sapoemëruar dhe Shefin e Delegacionit të Bashkimit Evropian në Maqedoninë e Veriut, David Geer, i cili i dorëzoi kopjet e letrave kredenciale për emërimin e tij. “Po vini në një moment jashtëzakonisht të rëndësishëm për vendin tonë dhe për rrugën tonë drejt BE-së. Pas vendimit historik të muajit mars për fillim të negociatave, besojmë dhe presim që vendet anëtare, së shpejti, në kuadër të kryesimit gjerman me Këshillin e BE-së, do të bien dakord për Kornizën negociuese, dhe se deri në fund të vitit, do ta mbajmë Konferencën e parë ndërqeveritare, e cila do ta shënojë fillimin konkret të procesit negociues”. Mbështetemi në përvojën tuaj dhe në përkrahjen tuaj të sinqertë në këtë rrugë, e cila do të paraqesë sukses historik të përbashkët që nga fillimi i mandatit tuaj”, theksoi Osmani, duke i uruar mirëseardhje të ngrohtë Ambasadorit Geer në Republikën e Maqedonisë së Veriut. Osmani shprehu kënaqësinë që me Ambasadorin Geer, Maqedonia e Veriut fiton një diplomat me eksperiencë dhe aleat i cili në mënyrë profesionale dhe parimore, do të investojë në perspektivën evropiane të vendit, që është e një rëndësie të jashtëzakonshme për vendin në prag të publikimit të Raportit vjetor dhe pakos për zgjerim të Komisionit, si dhe pritjet që vendi sërish të marrë vlerësime pozitive.Osmani e shfrytëzoi takimin me Ambasadorin e sapoemëruar që ta përcjell mirënjohjen e Qeverisë deri tek Komisioni Evropian për mbështetjen e siguruar në ballafaqimin me sfidat e krizës së COVID 19, si dhe për solidaritetin e demonstruar gjatë kohës së pandemisë nga ana e Bashkimit Evropian.
