Ministri i Punëve të Jashtme të Republikës së Maqedonisë së Veriut, Bujar Osmani sot realizoi takim me Ministrin e Punëve të Jashtme të Republikës së Serbisë, Nikolla Selakoviq, në margjinat e takimit të Procesit për Bashkëpunim me Evropën Juglindore, në Antalia, Turqi.Në takim, bashkëbiseduesit riafirmuan përpjekjet e përbashkëta për mbajtjen e kontinuitetit në ndërtimin e marrëdhënieve të mira ndërfqinjësore dhe avancimin e tyre të mëtejshëm si kontribut për stabilitetin, sigurinë dhe prosperitetin e rajonit.Me vëmendje të veçantë dhe kënaqësi u shqyrtuan projektet konkrete në rritjen e dinamikës në bashkëpunimin rajonal, si në kuadër të Procesit për Bashkëpunim në Evropën Juglindore, ashtu edhe në pritje të mbajtjes së Samitit të BE-së dhe Ballkanit Perëndimor, që në kuadër të Procesit të Berlinit do të mbahet në Sofje, javën që vjen.“Ne, vendet e rajonit kemi një qëllim të përbashkët, bashkim nën ombrellën e BE-së. Zhvillimi i marrëdhënieve dhe bashkëpunimi në rajon paraqesin nxitje shtesë për realizimin e perspektivës evropiane, por edhe burim autentik i stabilitetit dhe një e ardhme e parashikueshme, që është interes bazë i secilit vend nga rajoni”, theksoi ministri Osmani.Bashkëfolësit potencuan edhe bashkëpunimin e shkëlqyeshëm në mes dy vendeve, si dhe vendimin e fundit të kryeministrave të Maqedonisë së Veriut, Serbisë dhe Shqipërisë për hapjen e kufijve për lëvizje të lirë pa nevojën e dorëzimit të testeve, duke filluar nga 10 nëntori 2020.
