Ministri i Mjedisit Jetësor dhe Planifikimit Hapësinor Naser Nuredini u takua sot me Narine Sahakjan, përfaqësuese e përhershme e Programit të Kombeve të Bashkuara për Zhvillim (UNDP). Në takim u diskutua vazhdimi i bashkëpunimit midis Ministrisë dhe UNDP -së në disa fusha, përfshirë rimëkëmbjen e gjelbër të ekonomisë nga kriza KOVID, rritjen e gatishmërisë së vendit për t’u marrë me fatkeqësitë natyrore dhe ndërhyrjet për të përmirësuar infrastrukturën për mbrojtjen nga përmbytjet, thatësirat dhe fatkeqësitë tjera ekstreme të motit.Temë e bisedës ishte edhe mbështetja për realizimin e angazhimit ambicioz të Republikës së Maqedonisë së Veriut në kuadër të Marrëveshjes së Parisit për ndryshimet klimatike për të zvogëluar emetimet e gazrave serrë për 82% deri në vitin 2030, krahasuar me nivelin e vitit 1990. Në këtë drejtim, Nuredini dhe Sahakjan diskutuan për bashkëpunimin në sigurimin e financimit të gjelbër që do të rriste investimet në burimet e rinovueshme të energjisë dhe efikasitetin e energjisë në sektorin privat dhe të banimit.Përfaqësuesja e përhershme e UNDP-së, Sahakjan, mandati trevjeçar i së cilës në vendin tonë përfundon në tetor 2021, e shfrytëzoi takimin për të falënderuar ministrin Nuredini për bashkëpunimin e suksesshëm me Ministrinë e Mjedisit Jetësor dhe Planifikimit Hapësinor vitet e fundit, duke theksuar se UNDP-ja do të vazhdojë të jetë partnere e ngushtë e zhvillimit të Republikës së Maqedonisë së Veriut në drejtim të realizimit të prioriteteve kombëtare dhe Qëllimeve të zhvillimit të qëndrueshëm nga Axhenda 2030.
