Ministri i Punëve të Jashtme, Bujar Osmani, në kuadër të Këshillit ministror të OSBE-së, kishte fjalim në sesion plenar të Këshillit. Në fjalimin e tij para Ministrave të vendeve pjesëmarrëse Osmani theksoi nevojën për ballafaqimin e përbashkët me sfidat me të cilat ballafaqohet rajoni i OSBE-së dhe më gjerë – si terrorizmi transnacional, kërcënimet e tregtisë së armëve, migrimi masiv dhe rritja e krizave humanitare. Organizata me mandatin dhe mjetet e saj mund të kontribuojë pozitivisht në atë drejtim, gjë që kërkon vullnet dhe mbështetje më të madhe politike nga vetë vendet. “Si krrzesues i ardhshëm i Organizatës në vitin 2023, Maqedonia e Veriut do të punojë për ruajtjen dhe promovimin e vlerave dhe parimeve thelbësore të OSBE-së, duke filluar nga fillimi i muajit të ardhshëm, si pjesë e treshes së kryesuesve, së bashku me Poloninë dhe Suedi”, ka thënë Osmani. Në fjalën e tij, Osmani theksoi Maqedoninë e Veriut si shembull të një demokracie multietnike funksionale, në harmoni me vlerat dhe obligimet e OSBE-së. Në fund, Osmani potencoi rëndësinë e perspektivës evropiane për rajonin, si një faktor i rëndësishëm për sigurinë dhe stabilitetin e tij. Në margjinat e Këshillit të Ministrave, Osmani ka takuar kolegë nga Finlanda, Polonia, Rumania, Malta, Austria, Shefin e delegacionit francez dhe përfaqësuesin e OSBE-së për lirinë e mediave.
