Ministri i Mjedisit Jetësor dhe Planifikimit Hapësinor Naser Nuredini, mori pjesë në Konferencën e Biznesit të mbajtur sot, së bashku me zëvendëskryeministrin Fatmir Bytyqi dhe drejtorët e Fondit për Inovacion dhe Zhvillim Teknologjik dhe Agjencisë për Promovimin dhe Mbështetjen e Turizmit, Festim Halili dhe Ljupço Janevski ku prezantuan mundësitë e investimit që ofron shteti ynë. “Zhvillimi i bazuar në mbrojtjen e mjedisit jetësor sigurisht që është i lartë në agjendën e zhvillimit. Ne planifikojmë të investojmë në zhvillimin e sektorit të energjisë, por në përputhje me agjendën e gjelbër evropiane dhe që synon përdorimin e burimeve të rinovueshme të energjisë, energjinë diellore, të erës dhe largimin e qymyrit nga përdorimi. Duke rritur sipërfaqen e zonave të mbrojtura nga 9% në mbi 13%, kemi hapur mundësi të reja për zhvillimin e ekoturizmit dhe rritjen e numrit të vendeve të gjelbërta të punës” – tha ministri Nuredini në Konferencën e Biznesit të mbajtur sot në EXPO DUBAI.
