Me ceremoni solemne është shënuar fillimi i Operacionit të përbashkët FRONTEX në Maqedoninë e Veriut.
Zëvendëskryeministri i parë, Artan Grubi i cili ishte e pranishëm në ngjarjen e sotme, përmes një statusi në faqen e tij zyrtare në Facebook shkruan se Maqedonia e Veriut tashmë ka një mbështetje më të madhe operative kufitare.
Grubi më tej ka bërë të ditur se Operacioni i përbashkët me FRONTEX do të zgjasë deri më 24 janar të vitit 2024.
Statusi i plotë:
Bashkë me Kryeministrin Dimitar Kovaçevski, ministrin e punëve të brendshme Oliver Spasovski, zëvendësministrin Nazim Bushi, drejtorin ekzekutiv të FRONTEX, Hans Leijtens, ambasadorin e BE-së, David Geer dhe anëtaren e Parlamentit Evropian, znj. Lena Düpont shënuam solemnisht fillimin e realizimit të marrëveshjes për operacionin e përbashkët me Agjencionin Europian për mbrojtje kufitare dhe bregdetare FRONTEKS.
Vendi ynë nga sot do të ketë mbështetje të madhe operative në menaxhimin e migracionit, parandalimin dhe zbulimin e krimit ndërkufitar. Ky bashkëpunim është mundësi e jashtëzakonshme për përforcimin e mekanizmave shtetërore në luftën kundër krimit dhe korrupcionit.
Mbështetja europiane e kapaciteteve tona operacionale përmes FRONTEX do të zgjasë deri më 24 janar të vitit 2024 me mundësi për zgjatjen e bashkëpunimit.
