Kryetari i Kuvendit të Republikës së Maqedonisë së Veriut, Talat Xhaferi, sot u takua me një grup parlamentarë të rinj nga Bosnja dhe Hercegovina të cilët janë pjesë e një grupi shumë-partiak nga të gjitha nivelet përfaqësuese të pushtetit në Bosnjë dhe Hercegovinë.
Kryetari Xhaferi, ndau me kënaqësi të veçantë informacione, përvoja dhe praktikë me deputetët e rinj të të cilët shprehën interes për ngjarjet aktuale politike në vendin tonë, për rrugën euro integruese dhe mundësitë e zgjerimit dhe thellimit të bashkëpunimit mes deputetëve të dy vendeve, dhe gjithsesi mundësinë e bashkëpunimit në nivelin më të lartë të kryetarëve të parlamenteve dhe në nivel të Grupeve Parlamentare të Bashkëpunimit.
Bashkëbiseduesit e rinj nga Bosnja dhe Hercegovina e falënderuan Kryetarin Xhaferi për kohën e ndarë për tu takuar me to, duke e ditur përgjegjësinë e një kryetari të një dhome ligjvënëse. Shprehën respekt të lartë për arritjet e Republikës së Maqedonisë së Veriut në kontekst të integrimit euro-atlantik e sidomos e theksuan stabilitetin politik dhe funksionalitetin e institucioneve në vendin tonë. Në plotësim, u interesuan edhe për nivelin e inkuadrimit të rinjve të grave në jetën politike në vendin tonë duke tërhequr paralele mes dy vendeve. Shprehën dëshirë edhe për dinamizmin e bashkëpunimit mes Republikës së Maqedonisë së Veriut dhe Bosnjës dhe Hercegovinës, për shkak të këmbimit të përvojave dhe ndihmës së ndërsjellë në procesin e integrimit të dy vendeve në Bashkimin Evropian.
