Kryetari i Kuvendit të Republikës së Maqedonisë së Veriut, Talat Xhaferi, sot realizoi takim me ministrin e Drejtësisë i Republikës së Shqipërisë, Ulsi Manja, i cili është në vend në suazat e Forumit ministror BE-Ballkani Perëndimor për Drejtësi dhe Punë të Brendshme, në kuadër të kryesimit të Mbretërisë së Spanjës me Këshillin e Bashkimit Evropian, i cili mbahet në dhomën tonë ligjvënëse.
Gjatë takimit Kryetari i potencoi marrëdhëniet e deritanishme bilaterale të shkëlqyera ndërmjet dy vendeve me konstatim se të dyja vendet i bashkon edhe miqësia e sinqertë dhe bashkëpunimi i cili ka tendencë që në periudhën e ardhshme të përforcohet akoma më shumë në suazat e integrimeve në BE. E informoi mysafirin se procesi i ndryshimeve kushtetuese si kusht për hyrjen në fazën e ardhshme të konferencës ndër-qeveritare, ku duhet të fillojë hapja e klasterëve të negocimit, duhet të rrumbullakohet gjatë këtij viti.
Xhaferi, siç thuhet, u ndal edhe në efektet pozitive të nismës rajonale Ballkani i Hapur, ku bashkë me Republikën e Shqipërisë dhe Republikën e Serbisë hapen mundësi për ndërlidhje dhe bashkëpunim rajonal dhe kjo gjithsesi paraqet një tregues për përparimin e vendeve të rajonit kah evropeizmi i tyre dhe hapja e rrugës drejt anëtarësimit në BE.
Ministri i Drejtësisë i Republikës së Shqipërisë, Ulsi Manja, shprehu kënaqësi dhe mirënjohje për mundësinë për takim me Kryetarin e Kuvendit të Republikës së Maqedonisë së Veriut, Xhaferi, dhe shfaqi interes për proceset aktuale që zhvillohen në Kuvend, sidomos për rrjedhën e shqyrtimit të Propozim Rregullores që është propozim i Kryetarit Xhaferi, mirëpo me një kontribut shumëvjeçar konstruktiv dhe konsensual të gjithë përfaqësuesve politikë parlamentarë.
Në fund, të dy bashkëbiseduesit u pajtuan se vetëm me bashkëpunim intensiv politik dhe të fqinjësisë së mirë edhe në periudhën e ardhshme mundemi si rajon të shpresojmë për një përparim dhe zhvillim të vërtetë.
