Kryetari i Bashkimit Demokratik për Integrim, Ali Ahmeti, përcolli urimet e tij më të sinqerta për Presidentin Donald Trump me rastin e marrjes së detyrës si President i Shteteve të Bashkuara të Amerikës. Kryetari Ahmeti vlerësoi se SHBA-të mbeten aleati më i rëndësishëm strategjik dhe një nga shtyllat kryesore të paqes, demokracisë dhe stabilitetit global.
Ai theksoi se qëllimi i politikës së BDI-së ka qenë dhe mbetet forcimi dhe thellimi i marrëdhënieve me Shtetet e Bashkuara të Amerikës, si një aleat i pazëvendësueshëm që ka dëshmuar vazhdimisht përkushtimin e tij ndaj promovimit të lirisë, drejtësisë dhe vlerave demokratike. Kryetari Ahmeti vlerësoi gjithashtu se Presidenti Trump, edhe gjatë mandatit të tij të mëparshëm, ka treguar vendosmëri dhe lidership në politikën ndërkombëtare, me fokus në avancimin e paqes, sigurisë dhe prosperitetit. Ai shprehu bindjen se Shtetet e Bashkuara të Amerikës, nën udhëheqjen e Presidentit Trump, do të vazhdojnë të jenë shembull i vlerave demokratike dhe mbështetëse e fuqishme e stabilitetit, zhvillimit dhe bashkëpunimit ndërkombëtar përballë sfidave globale.
