Tetovë, 28 maj 2026
Kryetari i Bashkimit Demokratik për Integrim, Ali Ahmeti, zhvilloi sot një takim me Sh.S. Iveta Hricová, Ambasadore e Republikës së Sllovakisë në Republikën e Maqedonisë së Veriut.
Gjatë takimit, Kryetari Ahmeti shprehu shqetësimin për erozionin e paprecedentë të Marrëveshjes Kornizë të Ohrit, marrëveshje që ka vendosur themelet e paqes, demokracisë multietnike dhe orientimit euroatlantik të shtetit. Ai theksoi se sot nuk bëhet fjalë vetëm për cenimin e frymës së saj, por për përpjekje konkrete që synojnë zhbërjen e substancës së Marrëveshjes përmes anulimit të ligjeve dhe mekanizmave që garantojnë barazinë dhe karakterin multietnik të shtetit.
Në këtë kontekst, Kryetari Ahmeti nënvizoi se çdo hap prapa nga këto arritje përbën jo vetëm rrezik për marrëdhëniet ndëretnike dhe stabilitetin e brendshëm, por edhe goditje ndaj investimit strategjik të Bashkimit Evropian dhe partnerëve ndërkombëtarë në ndërtimin e një Maqedonie të Veriut stabile, funksionale dhe të orientuar drejt vlerave evropiane.
Po ashtu, gjatë bisedës u theksua rëndësia e miratimit të ndryshimeve kushtetuese, si një hap i domosdoshëm për avancimin e procesit të integrimit evropian të vendit, forcimin e sigurisë, mbrojtjen e të drejtave dhe krijimin e perspektivave më të mira për të gjithë qytetarët e Republikës së Maqedonisë së Veriut.
https://www.facebook.com/share/p/18wPAUHMjE/?mibextid=wwXIfr
