Shkup, 16 shtator 2025
Kryetari i Bashkimit Demokratik për Integrim, Ali Ahmeti, priti në takim përfaqësuesit e OSBE/ODIHR-it, të udhëhequr nga Matteo Mecacci, Julia Mancin, Polona Zajec dhe Edin Shabani.
Gjatë takimit u diskutua për rëndësinë e organizimit të zgjedhjeve të lira, fer, demokratike dhe në përputhje me standardet evropiane, si një parakusht i domosdoshëm për zhvillimin demokratik të vendit.
Kryetari Ahmeti theksoi se Republika e Maqedonisë së Veriut ka ende hapësirë për përmirësimin e ambientit zgjedhor, me qëllim garantimin e barazisë, transparencës dhe drejtësisë për të gjithë pjesëmarrësit në proces.
Ai nënvizoi se diskursi politik duhet të mbështetet në argumente, ide dhe vizion për të ardhmen e vendit, ndërsa përgjegjësia kryesore për organizimin e një procesi zgjedhor të rregullt dhe kredibil i takon institucioneve përgjegjëse dhe pushtetit.
Kryetari Ahmeti riafirmoi përkushtimin e Bashkimit Demokratik për Integrim për të mbrojtur standardet demokratike, proceset e lira zgjedhore dhe perspektivën evropiane të vendit.
