Kryetari i Bashkimit Demokratik për Integrim, Ali Ahmeti, me rastin e 4 Korrikut – Ditës së Pavarësisë së Shteteve të Bashkuara të Amerikës, u përcolli urimet më të përzemërta popullit amerikan, duke vlerësuar këtë datë si simbol të lirisë, demokracisë dhe aleancave të forta ndërkombëtare.
Kryetari Ahmeti theksoi se shqiptarët dhe Republika e Maqedonisë së Veriut kanë ndërtuar një partneritet të thellë dhe të qëndrueshëm me Shtetet e Bashkuara të Amerikës, partneritet që ka qenë vendimtar në avancimin e lirisë, barazisë, integrimit euroatlantik dhe zhvillimit demokratik.
Ai vlerësoi se mbështetja e vazhdueshme amerikane dhe aleanca strategjike me SHBA-të mbeten garanci për të ardhmen euroatlantike të vendit dhe për ruajtjen e paqes e stabilitetit në rajon.
Me këtë rast, kryetari Ahmeti ritheksoi përkushtimin për forcimin e mëtejmë të marrëdhënieve me aleatin më të rëndësishëm strategjik dhe për vazhdimin e rrugëtimit të përbashkët në mbrojtje të vlerave të lirisë, demokracisë dhe paqes.
Zoti i bekoftë Shtetet e Bashkuara të Amerikës!
