Ministri i Ekonomisë, Kresnik Bekteshi, sot dhe nesër (11 dhe 12 tetor), do të vizitojë Pragën, Republikën Çeke, ku do të marrë pjesë në Takimin Joformal të Këshillit të Energjisë të Bashkimit Evropian, i cili organizohet nga Presidenca Çeke me Këshillin e BE-së.
Në takimin ministror joformal ku marrin pjesë vendet anëtare të BE-së dhe vendet e Ballkanit Perëndimor, do të shqyrtohet udhërrëfyesi për aktivitete të mëtejshme për të trajtuar çmimet e larta të energjisë dhe për të ofruar gaz natyror me çmime të përballueshme për konsumatorët në Evropë. Temë e diskutimit në takim do të jenë edhe udhëzimet e mundshme për reformimin e tregut të energjisë elektrike.
