Anëtare e zgjedhur e Këshillit të Përgjithshëm

Miranda Fejzullai-Murseli

Miranda Fejzullai Murseli, e lindur më 17 shkurt 1987 në Ohër, është një profesioniste e afirmuar në fushën e shkencave politike, me përvojë të gjerë në institucione shtetërore, veçanërisht në sektorët e mbrojtjes, qeverisjes dhe punës parlamentare. Ajo dallohet për orientimin drejt rezultateve, aftësitë e zhvilluara në komunikim publik, si dhe angazhimin e vazhdueshëm në punën me të rinjtë dhe çështjet evropiane.

Arsimin e lartë e ka përfunduar në Universitetin e Evropës Juglindore në Tetovë, ku ka diplomuar në Shkenca Politike me rezultate të shkëlqyera, ndërsa më pas ka ndjekur studimet master në Diplomaci, duke përfunduar të gjitha provimet me sukses. Më herët, arsimin e mesëm e kreu në Shkollën e Mesme Shtetërore “Niko Nestor” në Strugë, ku u dallua me rezultate maksimale.

Karrierën e saj profesionale e ka ndërtuar përmes angazhimeve në institucione të rëndësishme shtetërore. Aktualisht ushtron detyrën e këshilltares në Komisionin për Çështjet Evropiane në Kuvendin e Republikës së Maqedonisë së Veriut, ku kontribuon në përgatitjen e materialeve, analizave dhe koordinimin e aktiviteteve që lidhen me procesin e integrimit evropian.

Më herët, ka qenë e angazhuar në Kabinetin e Kryeministrit si bashkëpunëtore, duke asistuar në koordinimin e agjendës dhe komunikimit institucional. Një periudhë të gjatë, nga viti 2018 deri në vitin 2024, ka punuar në Kabinetin e Presidentit të Kuvendit, ku ka qenë përgjegjëse për përgatitjen e dokumenteve, komunikimin institucional dhe koordinimin e aktiviteteve të nivelit të lartë. Gjithashtu, në periudhën 2012–2014, ka qenë pjesë e Kabinetit të Ministrit të Mbrojtjes, duke kontribuar në aspektet organizative dhe administrative.

Përveç angazhimit profesional, Miranda Fejzullai Murseli ka një histori të pasur aktivitetesh dhe trajnimesh që nga mosha e re, duke marrë pjesë në gara të të folurit publik, projekte ndërkombëtare dhe iniciativa rinore. Ajo ka mbajtur edhe role udhëheqëse në organizata rinore dhe është vlerësuar për kontributin e saj në aktivitete edukative dhe komunitare.

Ajo zotëron aftësi të shkëlqyera komunikimi dhe organizimi, si dhe aftësi të avancuara analitike të ndërtuara mbi bazën e formimit të saj akademik dhe përvojës institucionale. Flet rrjedhshëm gjuhën shqipe, maqedonase dhe angleze, ndërsa ka njohuri të mira të gjuhës italiane dhe frënge.

Miranda Fejzullai Murseli vazhdon të kontribuojë në mënyrë aktive në proceset institucionale dhe integruese të vendit, duke u angazhuar me profesionalizëm dhe përkushtim në forcimin e institucioneve dhe avancimin e agjendës evropiane.