Ministri i Punëve të Jashtme, Bujar Osmani, sot, realizoi takim me delegacionin parlamentar të Izraelit në përbërje: Hamid Amar, kryetar i grupit parlamentar për miqësi dhe bashkëpunim me Maqedoninë e Veriut dhe Tsega Melaku, anëtare e grupit parlamentar të Knesetit.
Në takim u përshëndetën marrëdhëniet miqësore ndërmjet dy vendeve, ndërsa u bisedua edhe për thellimin e mëtejmë të bashkëpunimit me theks të veçantë në dimensionin parlamentar.
Krahas këtyre temave, fokusi u vendos në shënimin e 80-vjetorit të deportimit të hebrenjve maqedonas në kampin nazist Treblinka në vitin 1943, që këtë vit shënohet me më shumë ngjarje komemorative.
Njëherit, Osmani e theksoi rëndësinë e anëtarësimit të plotë të Maqedonisë së Veriut në Aleancën Ndërkombëtare për Përkujtimin e Holokaustit “IHRA”, si konfirmim i qartë i përkushtimit të vendit jo vetëm në përkujtimin, edukimin dhe kërkimin e holokaustit, por edhe në luftën globale kundër antisemitizmit dhe aktiviteteve të përgjithshme për avancimin e jetës së përfaqësuesve të komunitetit hebre në mbarë botën.
