Z. Valmir Aziri, sekretar shtetëror në Ministrinë e Kulturës së Republikës së Maqedonisë së Veriut, në emisionin Argument, në RTVM2 theksoi që Bashkimi Demokratik për Integrim ka dorëzuar dy amandamente në Parlamentin e Republikës së Maqedonisë së Veriut për të garantuar me ligj përfaqësimin adekuat të shqiptarëve në Ministrinë e Kulturës. Me këtë, do të parandalohet mbivotim nëpër komisionet e projekteve, ashtu siç ka ndodhur deri tani. Për më tepër, sekretari Aziri potencoi që vetëm zgjidhja sistemore me ndërhyrje në ligjin për kulturë do të ishte zgjidhja afatgjate. Sekretari Aziri theksoi edhe nevojën për të përfshirë badinterin / mekanizmin mbrojtës që ruan nga diskriminimi te puna e komisioneve si dhe te sjellja e programit dhe vendimeve që merren tash por edhe që do të merren në të ardhmen nga Ministri/Ministresha e Kulturës. Badinteri deri më tani është pjesë e të gjitha ligjeve që kanë të bëjnë me çështjen e arsimit, kulturës dhe interesave të shqiptarëve.
